Сайттан издөө
Сайттан издөө
Кыргыз Республикасынын Президенти

Президент Алмазбек Атамбаев мамлекеттик кызматкерлерди кесиптик майрамы менен куттуктады

Бүгүн, 2015-жылдын 23-июнунда, Кыргыз Республикасынын Президенти Алмазбек Атамбаев мамлекеттик кызматкерлерди кесиптик майрамы – Кыргыз Республикасынын Мамлекеттик кызматкерлеринин күнү менен куттуктады.

Куттуктоонун тексти:

«Урматтуу мамлекеттик кызматкерлер!

 Сиздерди кесиптик майрамыңыздар –  Кыргыз Республикасынын мамлекеттик кызматкерлеринин күнү менен куттуктайм!

Кыргызстан көптөгөн сыноолордон, кыйынчылыктардан ийгиликтүү өтүп, өнүгүү жолуна түштү.  Ынтымагыбызды арттырып, биримдигибизди чыңдап,  ири экономикалык бирликтердин бирине кошулдук.

Мындай жагдай мамлекеттик кызматкерлерге өзгөчө милдет артат. Ар бир мамлекеттик кызматкер  бардык дитин коюп, ниетин таза кармап, өлкөбүздү  өнүктүрүүгө өз салымын кошчу мезгил келди. Мамлекет мага эмне берет дебестен, мен мамлекетке эмне бере алам деп иштей турган учур келди. Мамлекетибизди четтен бирөө келип өнүктүрбөйт, өзүбүз гана бекемдеп, өзүбүз гана гүлдөтө алабыз.

Мамлекеттик кызматкерлер Кыргызстанды бекемдөөгө, тынчтыкты жана туруктуулукту сактоого, демократияны тереңдетүүгө, мыйзамдуулукту камсыз кылууга, элибиздин жашоосун жакшыртууга бардык күч-аракетин, билимин жана жөндөмүн жумшайт деп ишенем.  Анткени Улуттук стратегияны, өлкөдөгү  ири долбоорлорду, программаларды ийгиликтүү ишке ашыруу, мамлекеттин, жалпы коомдун туруктуу өнүгүшү көбүнесе сиздерге  байланыштуу.

Тарых бизге дагы бир жакшы мүмкүнчүлүк берди. Мамлекетибизге келген ооматты колдон чыгарбай, элибиздин ишенимин актап, биргелешип жаңы, гүлдөгөн Кыргызстанды курууга милдеттүүбүз!

Баардыгыңыздарга  чың ден-соолук, бакыт-таалай жана жооптуу ишиңиздерге ийгилик каалайм.

 

Кыргыз Республикасынын

Президенти                                                               Алмазбек Атамбаев»

2015-жыл 23-июнь